Areglo

Larawan mula sa http://www.sunstar.com.ph/sites/default/files/styles/large/public/field/image/article/blind_street_performer_busking_0.jpg?itok=Mm_jQHTG

Areglo
ni Louise Vincent B. Amante

Ilang ulit nang kinaskas
ng bulag na musikero
ang gitarang may biyak
ang bibig at ang mga kuwerdas
ay halos kalawangin na.
Silindro'y laylay 
sa sinasabitang batok.
Mikropono'y pumapalya.
 
Pero sige lang nang sige.

Pamilyar na mga kanta
ang tinutugtog, inaawit,
umaalingawngaw hanggang
sa kabilang panig ng overpass.
Ngunit kanina pa 
kinakapos
ang melodiya
ng mga barya
sa donation box.


Lungsod Quezon
15 Marso 2018