Haplos sa Apoy

Nang haplusin ko ang apoy,
napasò ang aking palad.
Minsan ay bughaw
at minsan ay dilaw
                   ang ningas
na aking namamalas.
Madalas, pula ang hugis
nitong aking nasasalat.
At nang dumaiti
ang aking hintuturo
                   sa liyab,
nadama ko
ang iyong nakadadarang
na pag-irog.


4 Pebrero 2017
Lungsod Quezon

Paghanap sa Mahiwagang Himig

Hangad kong masulyapan
ang himig sa hangin
ng mahiwagang daigdig
ng iyong lawas na mahiwaga.
Kung bakit ay makasasagot
ang bawat mong galaw
at bakas patungo sa lawag 
ng mga landas
na walang ngalan.

Umaalingawngaw rito
ang mahiwagang himig.
Inaawit ang iyong mukha,
ang iyong dibdib,
ang iyong baywang,
ang iyong hita...

Sasabay ako sa iyo
sa pagtunton at pagtungtong.
Dahil naniniwala akong naroon
ang hangad kong mahanap.
Sabi ng matatanda,
sundin ko ang aking kalooban
ay masusumpungan
ko ang aking pangarap.

Lalakad, tatakbo,
aakyat, gagapang ako
kung ibig mo -- masulyapan lamang
ang himig sa hangin
ng mahiwagang daigdig
ng iyong lawas na mahiwaga.



4 Pebrero 2017
Lungsod Quezon

Tatlong Haiku

1. Ang Pag-ibig ay Earphones

Tibok ng awit:
Dal'wang daloy ng himig
Sa 'king ulinig.

2. Ang Pag-ibig ay Aklat

T'wing bubuklatin
may haplos sa paningin
'yong sasabihin.

3. Ang Pag-ibig ay Suklay

Kahit na bungi,
hagod sa hiblang puti
dati nang gawi.


5 Pebrero 2016

Lakambini

Nais ko’y putungan ka ng Eric Javits Rabbit Felt Hat,

Subalit ipinutong mo ito sa life-size Sto. Niño.

Nais ko’y bihisan ka ng sutlang Plains and Prints,

Subalit sinilid mo ito sa kabinet.

Nais ko’y pabanguhan ka ng Bulgari,

Subalit tinago mo ito at di ko mahanap.

Nais ko’y kabitan ang iyong pulso ng Anne Klein,

Subalit isinabit mo ito sa sungay ng piguring usa.

Nais ko’y ipanlakad mo ang high heels na Gucci,

Subalit hinimpil mo ito sa likod ng pinto.

Nais ko’y gawin kang balot na reyna,

Subalit ikaw ang nagwagi na maging lakambini.

02/14/2013

Kung Sakaling Malagot Itong Ating Pag-ibig

Kung sakaling malagot itong ating pag-ibig,

Susuong tayo bawat sandali ng ligalig,

Hihimlay sa pastulang karayom ng tag-init,

Ngangatngat ng kalansay, malalagim na tinik.

Itong ating pag-ibig kung sakaling malagot,

Inipong alaala di agad malilimot;

Pagtatagpo tuwina’y naiibsan ang pagod

At sabay naapuhap ating labas at loob.

Malagot itong ating pag-ibig kung sakali,

Titipirin ang antok, pupuslit sa pusali,

Magkukubli hanggang sa pumuti ang labi

At magising na lusaw ang dila ng salapi.

Kung sakaling malagot itong pag-ibig natin,

Pinid ang ating puso sa gayong pangitain.

02/04/2012