"Tula Laban sa Mayaman" ni Robert Bly

Larawan mula sa https://www.horsetown.com/images/D/Bailey%20Red.png

Tula Laban sa Mayaman 
Robert Bly

Bawat araw na ako’y nabubuhay, bawat araw bumabangon
Ang dagat ng liwanag, tila nakikita ko
Ang luha sa loob ng bato
Na para bang namamalas ng aking mata ang ilalim ng daigdig.
Hindi naririnig
Ng mayamang lalaki suot ang kanyang pulang sombrero
Ang pananangis sa mga pueblo ng liryo, 
O ang maiitim na luha sa loob ng barong-barong ng mais.
Bumabangon bawat araw ang dagat ng liwanag
Naririnig ko ang tahimik, malungkot na yabag ng malulumbay na sandatahan,
Na bawat kasapi’y nananangis, at ang nahahapis
Na dalangin ng mga bato.
Yumukod ang mga bato sa pagdaan ng malulumbay na sandatahan.

- Salin sa Filipino ni Louise Vincent B. Amante 

From:

Bly, Robert. Silence in the Snowy Fields. Middletown, Connecticut: Wesleyan University Press, 1962. p 27.

Ang Propeta

Larawan mula sa https://dc95wa4w5yhv.cloudfront.net/image-cache/Elijah-the-prophet_825_460_80_c1.jpg

Ang Propeta

ni Louise Vincent B. Amante 

Nagbanta siyang magpaulan ng apoy.

Sino itong baliw na ito?

            Ang dungis-dungis.

Hanggang dito, umabot ang buang.

            Kung nakakurbata siya, maniniwala ako.

Itong bente, bumili ka ng kausap mo!

Nang pumula ang himpapawid,

Lahat sila’y nag-antanda.

Nasaan ang kanina’y nagbanta?

Nasa overpass.

“Ngayon kayo magsisi, mga hunghang!”

Pahayag niyang tawa nang tawa. #


30 Abril 2017
Hindang, Leyte

"Ang Mabutong Tadyang ni Adan" ni Jewel Kilcher

A detail from Michaelangelo's paintings in the Sistine Chapel in Rome, Italy. Photo from http://www.fineartprintsondemand.com/artists/michelangelo/creation_of_eve-400.jpg

Ang Mabutong Tadyang ni Adan
Jewel Kilcher

Nilisan ko ang mabutong tadyang ni Adan
para sa bunga
ng aking
sariling kagustuhan

Nakadagan ang samyo niyon
sa aking laman
ang aking pagkawala
ay tinik
sa kanyang tagiliran

Ngunit ngayon ang tiyan ko’y
hungkag at kumikirot
               nangungulila sa punla
               nangungulila sa mga halik
subalit sa labas pumaswit ang daan

at natagpuan ko ang sarili
na isinisilid ang pagiging babae
sa isang lumang bag na gawa sa balat

dahan-dahang humahakbang ang pag-ibig
palayo sa pinto

Salin sa Filipino ni Louise Vincent B. Amante

From:
Kilcher, Jewel. A Night Without Armor. NY: HarperEntertainment, 1999, p 2.

Orpheus

Orpheus and the Bacchantes (Gregorio Lazzarini, circa 1710, oil on canvas)
Photo from https://ferrebeekeeper.files.wordpress.com/2014/10/gregorio_lazzarini_-_orpheus_and_the_bacchantes_-_wga12527.jpg

Orpheus
Louise Vincent B. Amante 

Melancholy
fingers
plucking
the chords
of your lyre.
Dusk beginning to end.
"I've been up all night
Thinking of the hill
We used to climb..."
Drinking
your tears,
the strings
now
b
   r
      o
         k
            e
              n.
It was taken
as a signal
by the Bacchanals
to pluck out
your heartstrings.



22 March 2017
Quezon City 

"Pagbalik ng Tagsibol" ni Fernando Pessoa

Pagbalik ng Tagsibol

Fernando Pessoa (aka Alberto Caeiro)

 

Pagbalik ng Tagsibol
Marahil nilisan ko na itong daigdig.
Ngayon, gusto kong isiping tao si Tagsibol
Upang maharaya kong tumatangis siya para sa akin
Nang makita niyang wala na ang kanyang tanging kaibigan.
Ngunit ni hindi bagay ang Tagsibol:
Isa lamang itong paraan ng pagsasalita.
Maski ang mga bulaklak o mga luntiang dahon ay hindi bumabalik.
May mga bagong bulaklak, bagong luntiang dahon.
May mga bagong maaliwalas na araw.
Walang bumabalik, walang umuulit, dahil ang lahat ay tunay.

7 Nob 1915

-    Salin sa Filipino ni Louise Vincent B. Amante
22 Peb 2017 

From:

Pessoa, Fernando. Fernando Pessoa & Co.: Selected Poems. Edited and translated from the Portuguese by Richard Zenith. New York: Grove Press, 1998. p 76.

Tatlong Diona

1. 'Pag malayo ang tanaw

'Pag malayo ang tanaw,
Ang kamay sa sorbetes
Biglang matutunaw.

2. Nabutas ang guwantes

Nabutas ang guwantes
Na sa pobre hiningi
Kamot na lang sa testes.

3. Pagkahaplos sa bungi

Pagkahaplos sa bungi
Kita ko nang malinaw
Mga ngiping tiningi.


14 Pebrero 2017
Kalye Limotkona

"Umaga" ni Arthur Rimbaud

Larawan mula sa https://i.ytimg.com/vi/wuLKvcn-c7A/maxresdefault.jpg

Umaga 
Arthur Rimbaud 

             Noong unang panahon, hindi kalugod-lugod, kaygiting, kahanga-hanga, karapat-dapat itala sa mga gintong dahon ang aking pagkabata-anong palad! Anong krimen o pagkakamali ang nagpaparusa sa akin at nagpapahina sa akin ngayon? Sa inyong mga naniniwalang lumuluha ng hapis ang mga hayop, na nagdurusa ang mga maysakit, na binabangungot ang mga patay, subukin ninyong ipaliwanag ang aking pagbagsak, at ang aking paghimbing. Hindi ko na lubusang maipaliwanag ang aking sarili higit sa isang pulubing bumibigkas ng Ama Namin at Aba Ginoong Maria. Hindi na ako makapagsalita! 

            At, ngayon, naniniwala akong nabigkas ko na ang aking impiyerno. Tunay ngang impiyerno; tunay na tunay, na ang anak ng tao ang nagbukas sa mga pinto niyon. 

            Mula sa katulad na disyerto, sa gabi ring iyon, walang hanggang nakatitig ang mga pagal kong mata-sa bituing pilak, ngunit hindi nito pinakikilos ang mga Hari ng buhay, ang tatlong mago-puso, kaluluwa, diwa. Kailan, higit sa mga bundok at ilog, natin yayakapin ang pagsilang ng mga bagong pagpupunyagi, bagong karunungan, ang paglisan ng mga tirano at demonyo, ang wakas ng mga pamahiin, at maging mga unang sasamba sa Pasko sa buong mundo! 

            Ang awit ng langit, ang pag-unlad ng mga bayan! Mga alipin, huwag sumpain ang buhay na ito.

- Salin sa Filipino ni Louise Vincent B. Amante

From:

Rimbaud, Arthur. Rimbaud Complete Volume 1: Poetry and Prose. Trans. by Wyatt Mason. New York: Modern Library, 2002. p 218.

Haplos sa Apoy

Nang haplusin ko ang apoy,
napasò ang aking palad.
Minsan ay bughaw
at minsan ay dilaw
                   ang ningas
na aking namamalas.
Madalas, pula ang hugis
nitong aking nasasalat.
At nang dumaiti
ang aking hintuturo
                   sa liyab,
nadama ko
ang iyong nakadadarang
na pag-irog.


4 Pebrero 2017
Lungsod Quezon

Paghanap sa Mahiwagang Himig

Hangad kong masulyapan
ang himig sa hangin
ng mahiwagang daigdig
ng iyong lawas na mahiwaga.
Kung bakit ay makasasagot
ang bawat mong galaw
at bakas patungo sa lawag 
ng mga landas
na walang ngalan.

Umaalingawngaw rito
ang mahiwagang himig.
Inaawit ang iyong mukha,
ang iyong dibdib,
ang iyong baywang,
ang iyong hita...

Sasabay ako sa iyo
sa pagtunton at pagtungtong.
Dahil naniniwala akong naroon
ang hangad kong mahanap.
Sabi ng matatanda,
sundin ko ang aking kalooban
ay masusumpungan
ko ang aking pangarap.

Lalakad, tatakbo,
aakyat, gagapang ako
kung ibig mo -- masulyapan lamang
ang himig sa hangin
ng mahiwagang daigdig
ng iyong lawas na mahiwaga.



4 Pebrero 2017
Lungsod Quezon

"Isang Ulat" ni Kenji Miyazawa

Larawan mula sa: https://iembracegraceblog.files.wordpress.com/2012/07/rainbows1.jpg

Isang Ulat

Kenji Miyazawa

Ang “apoy” na kanina’y nagpabahala sa marami ay isa lamang hablondawani

Isang oras na mahigpit na nakatali sa magkabilang dulo ng langit

Salin sa Filipino ni Louise Vincent B. Amante


From: Miyazawa, Kenji. Strong in the Rain: Selected Poems. Translated by Roger Pulvers. Northumberland: Bloodaxe Books Ltd., 2007, p. 89.