"Matatag sa Ulan" ni Kenji Miyazawa

Matatag sa Ulan

ni Kenji Miyazawa

Matatag sa ulan

Matatag sa ihip ng hangin

Matatag sa init ng tag-araw at lamig ng niyebe

Malusog siya’t malakas

Malaya sa pagnanasa

Di siya nagagalit

Di rin naglalaho ang kaniyang ngiti

Kumakain siya ng apat na tasa ng genmai*

Miso at ilang gulay kada araw

Inuuna niya ang iba

Kaysa kaniyang sarili

Ang kanyang talino

Ay mula sa pagmamasid at karanasan

Na palaging nasa kaniyang isip

Nananahan siya sa munting kubo

Sa lilim ng anino ng mga punong pino

Kung may batang maysakit sa silangan

Pumaparoon siya upang mag-alaga

Kung may pagal na ina sa kanluran

Pumaparoon siya at binubuhat ang kaniyang mga binigkis na palay

Kung may naghihingalo sa timog

Pumaparoon siya at nagwiwika, “Huwag matakot”

Kung may gulo at hablahan sa hilaga

Ginigiit niyang itigil ang kanilang kalokohan

Nananangis siya sa tagtuyot

Hindi siya mapalagay tuwing malamig ang tag-init

Kumag  ang turing sa kaniya ng lahat

Walang umaawit sa kaniya ng mga papuri

O dinidibdib siya

Gayong uri ng tao

Ang aking nais maging.

*genmai – pinawà, bigas na hindi pinaputi

Salin sa Filipino ni Louise Vincent B. Amante

From: http://mooninthewater.net/aikido/2012/10/13/translating-japanese-strong-in-the-rain/