Agunyas

Nagkukumot ng itim ang langit
sa sandaling itong
nagmamadali ang mga paang
makasakay sa makikipot
na entrada ng mga bumabaybay
                na dyip
                at UV Express
dito sa kanto ng Aurora Blvd
               at Edsa.

Yabag ng mga paa’y tila nais takasan
ang lungsod na ito –
na para bang nagiging puno’t dulo
ng kanilang mga suliranin.

Ngunit bukas, bago pa man
ang pagputok ng liwanag,
babalik silang muli
upang hagilapin
sa mga opisina, pabrika,
           eskwelahan, bilyaran,
           mall, palengke,
at mga kanto’t kalyehon
ang halimuyak ng metano,
                      monoksido’t
                      karbon
ng mapagpalang lungsod na ito.


1/2/2014