Kung pagsaulan kong basahin sa isip
ang pangakong daang malinis at matwid,
pinaghahariang hasyenda'y kailan
mapapasakamay ng mga nagbungkal?
Yaong alaalang laging pinanganganiban,
baka nakalimot sa pinangakuang
mga magsasakang tanging pinangarap
pagdurusa't lungkot sadyang mabaligtad.
Parang naririnig ang lagi mong wika:
"Ngayo'y matatapos na'ng pagdaralita,"
kapalit ng dating gloryang nagbusabos
sa bayang malaon nang napayukayok.
Nagbabalik mandi't parang hinahanap
ngunit baka naman iyon nga'y lumipas
na't sinambit lamang upang may masabing
kahali-halina sa bayan kong sawi.
Ito'y unang bukal ng bait kong kutad
ngunit 'wag itapon, baka ikasugat
ng iyong mahinang puso't di makaya
ang mga parating na tulang may sima.
08/15/2010
No comments:
Post a Comment