Kaimito (multiply post, Apr 18, '11 4:57 PM)

Mama, Mama, bili na kayo
Nitong tinda kong kaimito
Ipagbibiyak ko po kayo
At nang matikman na po ninyo.

            Ale, ale, mawalang galang
            Na po. Baka presyo’y mahal.
            Pera sa aking bulsa’y kulang
            At hindi kayo mabayaran.

Mama, mama, kapag tumikim
Sa aking kaimito, aliw
Ang inyong madarama. Maliw
Ng kalooba’y makikitil.

            Ale, ale, tunay ba’ng sarap
            Ng inyong tinda? Tila payat
            At hinog sa pilit. Pagkagat,
            Baka sangsang ang halimuyak.

Mama, mama, ito pong tinda’y
Sariwa sa sanghaya’t lasa.
Kutis ay makintab na lila
Katas ay di paris sa iba.

            Ale, Ale, kung gayo’y alok
            Na kaimito’y sadya’ng hulog
            Ng langit sa’kin. Kaya, sagot
            Ko, isa nga po’t nang mabusog.


03/19/2011

 

Tags: literature, tula, poetry, panitikan

 

http://lvbamante.multiply.com/journal/item/73/Kaimito